Helgina 7.-9. febrúar héldu tólf vaskir félagar til Hólmavíkur til æfinga í snjóflóðaleit.
Æfingarsvæðið var svo sett upp á Þröskuldum í Arnkötludal. Veðrið lék félaga okkar frekar grátt en fyrsta daginn voru 27 m/s og skafrenningur. Daginn eftir hafði lægt nokkuð en Þröskuldarnir voru samt lokaðir fyrir bílaumferð mestan hluta dagsins, enda skyggni slæmt og vindstyrkur nokkur.
Hundar og menn létu þetta ekki á sig fá, heldur æfðu af kappi á tveimur leitarsvæðum. Enda er mikilvægt að hundar geti unnið í öllum veðrum. Æfingar gengu vel á heildina litið enda mikilvægt að æfa stíft þar sem stutt er í vetrarnámskeiðið. En á vetrarnámskeiði Björgunarhundasveitarinnar þurfa teymi að standast próf til að halda sér á útkallslista eða komast á hann.
